اسلام
عجب رنگ پرہے بہار مدینہ
از مولانا حسن بریلوی علیہ الرحمۃ
عجب رنگ پرہے بہار مدینہ
کہ سب جنتیں ہيں نثار مدینہ
مبارک ہو اے عندلیبوں تمہیں گل
ہمیں گل سے بہتر ہے خار مدینہ
مری خاک یارب نہ برباد جائے
پس مرگ کردے غبار مدینہ
رگ گل کی جب نازکی دیکھتاہوں
مجھے یاد آتے ہیں خار مدینہ
جدھر دیکھیے باغ جنت کھلا ہے
نظر میں ہیں نقش ونگار مدینہ
رہیں ان کے جلوے بسیں ان کے جلوے
مرا دل بنے یاد گار مدینہ
بنا آسماں منزل ابن مریم
گئے لامکاں تاجدار مدینہ
